Grupa III, cyli jak bydzie wyglōndać liga we nowym syzonie

Ruch Chorzów słożōł wniosek licencyjny na gra we III Lidze, we syzonie 2019/20. Jak dostanymy licyncjŏ, to zagrŏmy we III Grupie III Ligi. Fto jesce tam grŏ?

8 czyrwcŏ zakońcōły sie rozgrywki we III grupie III Ligi. Awans wywalczōł Górnik Polkowice (79 pkt.), a ze racji, że ze II Ligi slatujôm aż 3 Ślōnskie drużiny, to we tyj grupie mŏmy 6 spadkowiczów (MKS Kluczbork 42 pkt, Warta Gorzów Wielkopolski 37 pkt, Agroplon Głuszyna 34 pkt, Ruch Radzonków 32 pkt, Lechia Dzierżoniów 26 pkt, Stilon Gorzów Wielkopolski 25 pkt).

Kluby kiere sie utrzimały to Ślęza Wrocław, Zagłębie II Lubin, Rekord Bielsko-Biała, Gwarek Tarnowskie Góry, Górnik II Zabrze, Ruch Zdzieszowice, Pniówek Pawłowice Śląskie, Piast Żmigród, Miedź II Legnica, Foto-Higiena Gać, Stal Brzeg.

Do nich dołŏnczajōm Rozwój Katowice i ROW 1964 Rybnik – spadkowicze ze II Ligi. Falubaz Zielona Góra awansowŏł ze IV ligi, LZS Starowice i Polonia Głubczyce jesce walczŏm ło awans (łostatniŏ raja szpilów 15 czyrwcŏ). A we barażach ło awans zagrajōm LKS Czaniec ze Polonią Bytom i AKS Strzegom ze Śląskiem II Wrocław. Nŏjpoźnij 19 czyrwcŏ powinni my znać komplyt uczestników III Ligi III Grupy.

Na sŏm koniyc jeszcze trocha informacji. Do UM Chorzow wpłynyła ino jedna oferta na promocja miasta bez szport – oferta Ruchu. Piyniondze Ruch bydzie dostŏwŏł we ratach.

Do zajynć fusbalorze majōm wrŏcać 17 czyrwcŏ. Na tyn momynt niy wiadomo fto bydzie ich trenowŏł. Kontrakt trynera Michalskiego je ważny ino do 30 czyrwcŏ. Kandydaci co chwila rezygnujŏm ze prowadzyniŏ Ruchu. Na ta chwila nŏjbliżyj je Mirosław Smyła.


własne

Komentarze