Nadziyja umiero łostatnio – Wiara niy umiero nigdy

Jak je dobrze to kożdy godo, że tak mo być, ale jak je trocha gorzyj to zarozki zacynajom sie łobawy, zarozki godajom, że to je koniyc, ale kajsik tam sie tli nadziyja, że bydzie przeca jesce dobrze.

Tako je natura kybica, że mo swoje zdanie na kożdy tymat, no i niy zawsze je to dobro łopinia. Przikład? Nawet jo, jak terozki, łostatnio boło niy nojlepij to żech sie boł, że nos już niy bydzie, że kożdy nos chce ino uwalić tak, co zniknymy ze fusbalyrskij mapy, żech godoł nawyt kumplom, że bydymy mieć bieda sie uczimać i potyn dostać licyncja. I moja łopinio niy boła łodłosobiono, bo takich ludzi jak jo boło wiyncyj.

Ale kajś we tych wszistkich myślach, godkach, problymach, czowiyk pamiynto co tyn Klub juz nie roz pokozoł i wiela to juz problymów przeszoł i jak sie tak potyn na spokoju pomyśli to sie wiy, że przeca musi być lepij, a ku tymu wystarcy jedyn impuls, jedyn szpil na poziomie, casym nawet jedna akcja ino, co pokoże, ze somy we sztandzie srobić wszistko co cza, co by my sie uczimali, a tako mioła miyjsce łostatnio we Warszawie.

Tam my zagrali szpil syzonu. Taki szpil boł nom poczybny, co by zaś odżoła nadziyja we kybicach, fusbalorzach i zasioła niypywność we inkszych klubach, że nos niy ma lekko łograć, że tukej bydom walcyć ło kożdy koncek trowy. I ftoś powiy, to boł jedyn szpil, ale wiela znaczy? A no wiela!

Jedyn szpil pokozoł, że my nie som lojtki do lonio i pokozoł, że ta naszo kybicowsko nadziyja mo swoja podstawa i to solidno. Łona ponoć umiyro łostatnio, a póki kajś sie tam w nos tli i póki fusbalorze dowajom takie wystympy, jak tyn łostatni we stolicy, to cza sie klupnonć w piyrś, że sie kajsik tam zwontpioło. Cza mieć ta nadziyja, że bydzie lepij niż boło i cza mieć wiara, że te chopcy – fusbalorze – dadzom rada i wywalczom nalyżne nom miyjsce we Ekstraklasie.

Na koniyc zacytuja trocha ze piosynki jednygo ze wiyrnych kybiców Ruchu – Kingu Bułka:

“Posuchejcie co wom godom, bo to przeca nojważniyjsze, jak cztyrnoście my zdobyli, to piytnosty tyż nadejdzie, cza w to wierzyć jak jo wierza, cza mieć wiary pełne serce, cza niy myśleć ło porażkach, ale ło tym co nojlepsze i niy łomać wiary swojyj i łod nowa przeć do przodku, bo nie ważne co się nosi, ważne to co sie mo w środku, bo drużyna niy galoty, niy robota, niy fuzekle, niy jak dwa łostatnie piwa, nie jak z starych garców dekle i niy można się jyj zmieniać jak się komu tak podobo, wsadźcie se do głowy swojyj co Chorzowski kibic godo”.


Dyjwid

Komentarze

Dodaj komentarz

Twój adres email nie zostanie opublikowany.