Bo liderów dwóch, nŏm niy potrzeba! Ruch wygrywŏ we Kluczborku!

To miŏł być prowdziwy test nôszyj drużiny. Czworto raja, szpil na szczycie nôszyj grupy III Ligi, kybice, doping i nôjważniejsze 3 punkty.

Szpil jak szpil. Juz my sômy nauczyni, że rywale chcôm przyciś, ale dzisiôj wyglondało to trocha inaczyj. Fusbalorze gospodôrzy skupiyli sie na Mariuszu Idziku, co bōło widać fest. Dziynki tymu, że pilnowało go kupa fusbalorzy, to zrobiôł sie plac do inkszych nôszych grajków.

Gospodôrze dugo utrzimywali zero ze zadku, ale widać bōło, że to ino kwestia minut, coby bala wleciôła do nyca Dawida Witka. Łod 30 minuty na szpilplacu grôł juz ino Ruch. We 32 minucie Wini podôł bala do Foszmańczyka, tyn uderzōł i bala po rynce tormana wkulała sie do tora! Eins do Ruchu! Trza tu pedzieć, że tak richtig to bōł farfocel, ale liczy sie, że wleciała bala do tora 🙂

Pora minut pôźnij juz mielimy zwei! 39 minuta, cyntruje fajnie Wini, a we elwrze MKSu fajnie uwalniô sie Kasolik. Kepa i bala we torze! Ruch grôł tak pewnie bo côłki czôs trwôł doping kybiców Ruchu Chorzów! Naliczylimy, ze do pauzy kybice mieli 3 minuty bez dopingu.

We drugij połowie szpilu mielimy łobrôz ze łostatnigo szpilu (u sia ze Wartą Gorzów Wlkp.). Niy musieli my forować tympa, ino grać spokojno bala i czekać na swoje łokazje. Te jednak mieli fusbalorze MKSu. We 57 minucie za dużo placu łostawiyli my byłemu fusbalorzowi nôszyj drużiny – Bartoszowi Włodarczykowi. Uderzōł na wysokości kolan tormana i Tomek Nowak niy dôł rady tego łobronić. 1-2.

Tyn tor rozochociōł gospodôrzy, kierzi co chwila starali sie wlyźć na nôsze pole karne, ale widać bōło naszô mondrość we grze. Niy wybijali my bala na oślep, a pode pressingiem potrafili my sie poradzić i wyłazić ze zagrożyniô. Bōło widać trocha nyrwów, bez co syndzia gwizdôł trocha czynścij faule do MKSu, ale ze tych wolnych nic niy wynikało.

We 81 minucie zacli my akcja ze środka szpilplacu, a kole 16 metra stôł Ecik. Dostôł bala i… zawinôł do tora MKSu. Bala sleciôła za rynce tormana i mieli my drei!

Szpil bôł momyntami nyrwowy, ale Ruch pokozôł klasa i zasłużynie, już do końca szpilu niy dôł łokazji gospodôrzom na jakieś poważne zagrożynie. Ze nôszyj ligi włazi ino jedna drużina i na tym placu kiery je prymiowany awansym jest Ruch. Bo liderów dwóch nŏm niy potrzeba 🙂

Trza tyż podziynkować gospodôrzom, że organizacyjnie niy dali plamy. Kybice Ruchu we dosyć znacznyj liczbie udali sie na szpil. Poczôntkowo niy wpuszczali wszistkich, ale to ze wzzdlyndu na pandymia. Co ciykawe, znalyźli do nôs place na innych sektorach i bōła bez to fajnô atmosfera. Dziynkujymy MKSowi Kluczbork.

Nŏsz plus szpilu: Ciekawe, czy wôs zaskoczymy, ale nôszym zdaniem to Mateusz Winciersz zasłużōł na tego plusa. Zbierōł już we szpilu ze Wartą, ale dzisiej 3 asysty i 120% jego zaangażowaniō fest pomogło przi utrzimaniu dobrego wyniku. Wini tora niy szczelōł, ale stawiômy, że za chwila tyż bydzie sie wpisywać na listy szczelców. Póki co taki asystent tyż je potrzebny. Gratulujymy udanygo wystympu!

MKS Kluczbork – Ruch Chorzów 1-3 (0-2)

Skład MKSu: Witek – Orłowicz, Nykiel, Paradowski, Mazur, Jaszczak, Baraniak, Smolarek, Przystalski, Witkowski, Włodarczyk.

Skład Ruchu: Nowak – Kasolik, Kawula, Kulejewski – Kwaśniewski, Mokrzycki, Sikora, Foszmańczyk, Winciersz – Janoszka, Idzik.

Tory: Włodarczyk 57 min. – Foszmańczyk 32 min., Kasolik 39 min. Janoszka 81 min.

Kartki: 6 min. Kulejewski (żk), 74 min. Kawula (żk)


własne