Ciężko przeprawa Ruchu ze Stalą [RYLACJA]

We sobotni wiecór, bez kybiców – bo wlajzły nowe łobostrzynia, Ruch Chorzów szpilŏł ze Stalą Brzeg ło fest ważne punkty do tabyli.

Genau 17 października właziły nowe łobostrzynia i szpil Ruchu niy môg sie łodbyć ze udziałym kybicow, beztosz atmosfera bōła richtig szparingowo.

Ino jak sie tak poleku na wszistko zaglōndo, to Ruch zacôn szpil fest dobrze. Atakowôł, cis, kombinowôł i we 20 minucie nawet wylyźli my na prowadzynie! Po cyntrze bala ze kepy szczelōł Konrad Kasolik i torman sie niy spodziewôł, że bala wleci mu do tora. EINS!

Zanim my sie nacieszyli torem, bōło już po eins. We 23 minucie Celuch, kiery szukôł co chwila kaj sie urwać Kulejewskiemu w końcu dopiōł swego i wyloz sôm na sôm ze Kubą Balickim. Lobym, podcinkom pokonôł nôszego tormana i bōło 1-1.

Trocha to rozbiōło Ruch bo ewidyntnie łoddali my pole gościom, a te chcieli wyciōngnonć maksa ze tego szpilu. We 32 minucie bōł ek. Cynter na… kepa, kiero rynkom zastompiōł Celuch i bala wlajzła we łokiynko tora Bieleckiego. Niy ma gwizdka, niy ma sygnału cyli bōło 1-2.

Myślelimy, że na pauza zlejzymy ze 1-2, ale we 44, 45 minucie bala dostôł Mariusz Idzik. Minōł Szadego, pokulôł bala do tora, a ta znalozła droga i na pauza bōło po zwei!

Goście na bank chcieli tyn rymis utrzimać do końca, bo tak grali we drugij połowie szpilu, żeby ino niy szczylać, a nôs niy puszczać do szczału. Na nic sie to zdało, bo Ruch wyloz na ta połowa jak wilk na owce.

Przede wszistkim pomogła smiana Paszka, kiery zmienōł Mateusza Winciersza. Wini miôł wcześnij jedna setka, sôm na sôm łobroniōł Szady.

Pachu zrobiōł kawał roboty, a we efekcie, we 80 minucie szpilu szczelōł tora! To bōł jego piyrwszy tor do Ruchu we lidze! Slôz ze balom do środka, szczelōł we środek tora, a Szady na wykroku ino patrzôł jak bala wlatuje do tora!

Goście sie starali jesce cosik pociś, ale my we łobronie błyndow już niy popyłniali i zasłużynie wygralimy ze Stalą Brzeg 3-2!

Nôsz plus szpilu: Daniel Paszek. Wlóz we 61 minucie szpilu i zrobiōł show! Bōł na lewyj, bōł na prawyj, bōł we ataku i szczelōł tora! Jego bieganie prziniosło zamiyrzony efekt i ta zmiana bōła fest na srogi plus.

Ruch Chorzów – Stal Brzeg 3:2 (2:2)

Skład Stali: Szady – J. Kowalski, Banach, Danielik, Maj – Kuriata, Łukawiecki – Kamiński, Sypek, Zapotoczny (71′ Niemczyk) – Celuch.

Skład Ruchu: Bielecki – Będzieszak, Kasolik, Kulejewski, Kwaśniewski – Winciersz, Sikora, Duchowski, Foszmańczyk, Janoszka – Idzik.

Tory: Kasolik 21′, Idzik 45′, Paszek 80′ – Celuch 24′, 32′

Szpil szło słuchać we Radiu Widzew, kaj komyntowôł je Dejvid, a odsłuchać rylacja możecie tukej => LIVE Ruch- Stal


własne