Derby na rymis! – Relacja

We niydzielne popołednie, na sztadionie Szombierek Bytom, Ruch rozegroł szpil we ramach Nôjstarszych Derbów Ślōnska!

Piyrwsze 30 minut szpilu to typowy szpil derbowy. Bez wiynkszego zaangażowanio, na palcach jednyj rynki idzie wyliczyć wszistkie łokazje. Cynter Krzemienia chycony bez Nowaka, kepa Idzika, ale tyż chycono bez tormana.

We 34 minucie szpilu bala szła bez Idzika po prawym krzidle. Wlôz we elwra i zagrōł bala. Torman zrobiōł unfal, a bala trefiōła do Mateusza Winciersza, kiery na wślizgu trefiōł we bala i ta wlazła do siatki! Eins!

Drugo połowa zacynomy ze srogim animuszem. Nôjpierw walōł Sikora, wybiōł Brzozowski, a we 49 minucie walōł Paszek, ale tyż torman doł rada łobronić tyn szczał.

Potyn zaś bōł łokres gry jak to we derbach, ale łod 60 minuty wiyncyj ze gry mieli gospodorze. Roz blokowôł Kawula, roz Kasolik. Dwa eki bez dobryj cyntry Polonii.

Ze godnych odnotowanio je tyż żółto kartka do trynera Berety we 75 minucie szpilu, ale co do syndziowanio niy bydymy tukej sie wypowiadać.

Łostatnie momynty szpilu fest wyrównane, bez wskazanio ftto miołby cosik szczelić. Ruch grôł pywnie, a Polonia musiała sie łodkrywać. Dwie łokazje miôł Będzieszak, ale roz niy trefiōł we tor, a roz szczeloł za słabo i torman Polonii chyciōł bala.

We 90 minucie ek do Polonii, Nowak wypiōnstkowoł, ale dobitka ze kepy wlatuje do tora i Radkiewicz dowo rymis. Polonia jesce nos przycisła, ale do końca wynik już sie niy zmieniōł.

Fakt je taki, że Polonia Bytom mo jesce 3 zaległe szpile, a dalyj jest niypokonano we noszyj lidze. Muszymy zbierać punkty we nostympnych szpilach i, niy mogymy już ich nikaj tracić.

Nôsz plus szpilu: Niy ma innyj opcji! To musi być Mateusz Winciersz! Już 2 tydnie tymu godołech we Radiu Widzew, że ze takom formom „Wini” w końcu szczeli tora, a po wywiadzie do nóś, byłech pewny ło jego dyspozycja. Mimo, że to pomagier, to zachowoł fest czujność we elwrze Polonii i szczelōł we końcu upragniony tor! Terôz łoby ino szoł do przodu ze swojom skutecznościom i grôł jesce lepij!

Polonia Bytom- Ruch Chorzów 1-1 (0-1)

Skład Polonii: Brzozowski – Budzik, Bedronka, Radkiewicz, Hałgas – Pośpiech, Stefański, Wuwer, Krzemień, Chwastek – Żak.

Skład Ruchu: Nowak – Kwaśniewski, Kasolik, Kulejewski, Winciersz – Paszek, Kawula, Sikora, Mokrzycki, Janoszka – Idzik.

Tory: Winciersz – 34 min. ; Radkiewicz – 90 min.


własne