Dobrŏ drugŏ połowa dŏwŏ Ruchowi wygranŏ!

Dzisiŏj, 1 sierpnia zacōn sie syzon 2020/21 we III grupie III Ligi. Na sztart, fusbalorze Ruchu pojechali do Świdnicy na szpil ze tamtyjszŏm Polonią-Stal.

Gospodŏrze, łod poczŏntku szpilu wlyźli na Ruch bez żŏdnych obaw. Juz we 13 minucie szpilu wylyźli na prowadzynie po błyndzie we wybicu bala bez Kamila Lecha. Dorian Krakowski szczylŏł do pustygo tora i niy pomylōł sie.

Łod tego momyntu, Ruch starŏł sie cosik skryncić we ataku, ale brakowało nŏm dograń i… cylnych szczałów. We 25 minucie bala wybijŏł Kacper Będzieszak, ale wibijŏł ja pod nogi Wojciecha Szuby, tyn bez zastanowiyniŏ walōł we bala ze cŏłkij siyły i trefiōł we łokiynko tora Lecha. 2-0 i Ruch bōł rozbity.

Piyrwszy cylny szczał do Ruchu zobŏczyli my we 30 minucie, kiedy to Foszmańczyk dostŏł bala, łobracoł sie i szczelōł, ale we tormana. Do końca tyj czynści szpilu niy bōło juz nic ciekawygo.

Łod pauzy, za Będzieszaka pojawiōł sie Kasolik, a gra Ruchu zmiyniōła sie ło 180 stopni. Czynścij ze przodka, wiyncyj łokazji i efekt bōł we 55 minucie. Janoszka pocis prawŏm stronŏm szpilplacu, dogrŏł do Idzika, a Mariusz ze bliska szczylōł tora na kontakt. 2-1 i fest sporo czasu na łodrobiynie reszty strat.

Ruch niy dŏwŏł za wygranŏ i we 62 minucie zaś „Ecik” łodgrywŏ bala do niy pilnowanygo Michała Mokrzyckiego, tyn szczylŏł jak ze armaty i trefiōł na 2-2.

Ruch grŏł do końca i to dŏwŏło efekty! Po eku we 76 minucie tora szczelōł Kacper Kawula. Niy miŏł wiela do zrobiyniŏ, bo torman gospodŏrzy minŏł sie ze balym i stykło ino dotknŏnć bala. To zrobiōł Kawula. Chwila potyn, bo we 80 minucie bōło juz 2-4! Zaś minŏł sie ze balŏm Kot, a ze kepy do tora trefiōł Piotr Kwaśniewski.

Pod koniyc szpilu ze nŏjważniejszych informacji to drugŏ żółtŏ kartka do Mateusza Winciersza, ale ciynżko pedzieć, by bōła zasłużonŏ. Łostatnie minuty, łod 86 Ruch grŏł we osłabiyniu, ale kontorlowŏł sytuacjŏ i niy dŏł se już tyj wygranyj wyciŏngnonć.

Nŏsz plus szpilu: Łukasz Janoszka. Fest dobrŏ drugŏ połowa, asysty i rozprowŏdzanie balōw do ustawionych fusbalorzy. Bōł dzisiŏj fest ważnŏm postaciōm na szpilplacu i dziynki jego postawie dzisiŏj mŏmy 3 punkty.

Polonia-Stal – Ruch 2-4 (2-0)

Skład Polonii: Kot – B. Paszkowski, Barros, Orzech, P. Paszkowski, Sowa, Borowy, Szuba (63′ Myrta), Chajewski, Baumgarten, Krakowski (67′ Filipczak).

Skład Ruchu: Lech – Kwaśniewski, Kawula, Kulejewski, Będzieszak (46′ Kasolik) – Winciersz, Mokrzycki, Duchowski (58′ Sikora), Foszmańczyk (90′ Siwek), Janoszka (88′ Paszek) – Idzik.

Tory: Krakowski (13 min.), Szuba (26 min.) – Idzik (55 min.), Mokrzycki (62 min.), Kawula (76 min.), Kwaśniewski (80 min.)

Kartki do Ruchu: Będzieszak (żk – 1 min.), Kawula (żk – 22 min.), Winciersz (żk – 44 min. i 86 min.)


własne