Idzika dwa loby to na wygrano sposoby – opis szpilu Ruch – Lechia

Niydziela, wiecór, ciepło pogoda, 4128 kybiców. Nic ino szpilać i to tak, coby zdobyć trzi punkty!

Poczōntek szpilu i we ataku ino Ruch! Piyrwsze dwie cyntry chyto jesce Fabisiak, ale potyn już spychomy cołko drużina Lechii do łobrony.

18 minuta, bala mo Mokrzycki, włazi ze niom we elwra gości, szczylo po ziymi i… Eins! Bala wkulała sie pod tormanem i wleciała do tora!

26 minuta, szczylo Mokry, ale niycelnie, 27 minuta szczylo Ecik, torman chyto bala. 32 minuta szczylo piynknie Winciersz. Torman wybijo ze trudym na ek. To ino pora wybranych łokazji jakie stworzōł se Ruch do zdobyciô tora we tym fragmyncie szpilu.

Do pauzy Lechia szczylała 2 razy, ale piynknie broniōł Kuba Bielecki. Wcześnij Bielu zdobōł sie jeszcze na odwaga i dwa razy ogrôł rywali ze balym u nogi i… dobrze podawôł bale do kolegów ze drużiny.

Po pauzie łobroz szpilu sie nic niy zmieniōł. Bez pora momyntów, myślołech, że grômy ze Stadionem Śląskim we pucharze. Cołki czos bala na połowie rywali, a we 48 minucie jesce mieli my 2-0! Bala do Idzika, tyn lobuje tormana, kiery stôł kole 14 metra łod tora i bōł bez szans na chycenie tego bala! Zwei!

54 minuta, bala zaś mo Idzik. Chce lobować, ale waho sie, jednak pocis bala lobem, a Fabisiak zaś zaskoczony i… drei!

Niy zdônżyli my wciepnōnć info, że momy 3-0, a już bōło 4-0! Winciersz wyloz sôm na sôm, i uderzōł, ale we supek! Bala trefio pod nogi Ecika, a tyn sie ja ułożōł i szczelōł! Fabisiak niy mioł dzisiôj dnia na takie bale i musiôł zaś wyciōngać ja ze nyca.

Szpil trocha sie uspokojōł, ale kybice szikowali gryfno oprawa:

We tym fragmyncie szpilu pełno kontrola i dalszo dominacja wymagała wiynkszyj cierpliwości ze strony kybiców, bo szpil zrobiōł sie trocha nudnawy, ale niy bōło tak, ze my niy stwarzali sie łokazji. Wloz Będzieszak, Rudek, Siwek, Fosa. Tyn piyrwszy miôł nawet 3 łokazje, ale roz trefiōł kole supka, roz we tormana, a za trzecim razym tyż przeszczelōł.

We 90 minucie zaatakowali goście, szczał łobroniōł Bielecki, a bala po jego interwyncji trefiōła we supek. Mieli my kupa szczynścio we tyj sytuacji, ale na sôm koniyc momy zero ze zadku!

Nôsz plus szpilu: Niy ma tukej żodnyj godki! Mariusz Idzik, kiery piynknie załatwiōł rywala dwoma lobami jak nigdy zasługuje na plusa szpilu. Pewno gra, niy łodstowianie nogi i gowa, mondro gowa jako mo dała dzisiej kybicom piynkne widowisko i piynkne tory. Zasługuje na szacunek. Brawo!

Ruch Chorzów – Lechia Zielona Góra 4-0 (1-0)

Skład Ruchu: Bielecki – Kasolik, Kawula, Kulejewski, Kwaśniewski – Mokrzycki, Sikora, Janoszka, Winciersz, Duchowski – Idzik.

Skład Lechii ZG: Fabisiak, Ostrowski, Żukowski, Łokietek, Górski, Wieczorek, Babij, Kobusiński, Król, Ekwueme.

Tory: 18 min. Mokrzycki, 46 min. Idzik, 54 min. Idzik, 58 min. Janoszka.


własne