Ło powrót na dobro droga! Zapowiydź szpilu Ruch Chorzów – Lechia Zielona Góra

Na zakończynie 9 raji szpilów we III grupie III Ligi przidzie Ruchowi szpilać u sia ze Lechią Zielona Góra.

Lechia Zielona Góra to kolyjny klub, kiery powstôł po II wojnie światowyj, we 1946 roku. Nôjwiynkszym sukcesem klubu je 10 plac we II Lidze we 1956 roku i zdobycie Pucharów Polski na szczyblach okryngowych (13 razy we OZPN Zielona Góra i 4 razy we Lubuskim OZPN). We swojim składzie majōm znajome – byłe – gwiozdy Ekstraklasy, takie jak Łukasz Garguła czy Martins Ekwueme.

We syzonie 2019/20 zagrali my jedyn szpil ze Lechią. Na wyjyździe wygralimy 3-0 po torach Mariusza Idzika (x2) i Mateusza Winciersza. Do rywanżu niy doszło skuli pandymii.

We tym syzonie drużina ze Zielonyj Góry po 6 szpilach zajmuje 15 plac (2 wygrane, 1 rymis, 3 sfalone), a ich nôjlepszym szczylcem jest Szymon Kobusiński ze 5 golami na koncie.

Ruch, ze bojowymi nastrojami na tyn szpil, po 3 szpilach bez wygranyj chce wlyźć na właściwo droga i kożdy szpil wygrywać we jak nôjlepszym stylu. Zważiwszy, że Ślęza swój szpil wygrała (1-0 na wyjyździe ze Piastem Żmigród), a MKS Kluczbork sfaloł (0-2 u sia ze Zagłębiem II Lubin), to momy szansa na wskoczynie na 2 plac we tabyli ligowyj. Niy mogymy tracić punktów i cołko drużina mo tego świadomość. Nôsz typ: 2-1.

Szpil zacnie sie ło godzinie 19:20 na sztadionie przi Cichyj 6 we Chorzowie. Przipominômy, że dzisiôj we Grzibku niy kupicie biletu. Tych jesce trocha łostało, a kupicie je ON-LINE

Zaś ci, co niy dadzom rady kupić biletu i być na szpilu mogom kupić transmisja TV => Ruch – Lechia TV szpil skomyntuje dzisiôj Tomasz Ferens (rzecznik prasowy klubu) i Mariusz Śrutwa.

Dzisiôj, ze racji, że nosz panel do ślōnskigo LIVE zacyno sie zmiyniać, niy przeprowadzymy tradycyjnyj rylacji, ale śledźcie nôs na Twitterze i Facebooku kaj bydymy na biyżōnco, po naszymu łopisywać wydarzynia ze tego szpilu.


własne