Pełnŏ dominacja i chłodno gôwa! – Opis szpilu ze Foto Higieną Gać

Drugi szpil Ruchu, drugi na wyjyździe i drugi wygrany! Tym razym, drużina trynera Berety pojechŏła do Oławy, na szpil ze Foto-Higieną Gać.

Ruch zacôn szpil ze spokojym, a gospodŏrze zaś chcieli sie na nŏs ciepnŏnć, ale do 10 minuty niy wiela im to sie zdało. Potyn zaś wylŏz ze tora Kamil Lech i zrobiōło sie gorko, ale bala poleciała za lata po szczale jednygo ze fusbalorzy Foto Higieny. Chwila potyn, we 12 minucie dobro cyntra we elwer gospodŏrzy i ze kepy Neugebauer szczelŏł trocha za tor.

2 minuty potyn bōło juz 0-1! Ecik ciepŏł bala ze eka, ftoś ja tam wybijŏł i ta dostŏł Mariusz Idzik kiery przi supku znalŏz miyjsce i wyprowadziōł Ruch na prowadzynie. Łōd tego komyntu lepij i pewnij grało sie fusbalorzom ze Chorzowa. Co chwila próbowŏł abo Idzik, abo Neugebauer, a gospodŏrze ustawiali sie ino na kontry.

We 33 minucie bala chciŏł wybijać Neugebauer, trefiōł jednak we noga rywala i syndzia łodgwizdŏł elwra. Minuta pôźnij Przybylski zmylōł Kamila Lecha i bōło 1-1. Niy trza bōło czekać długo, bo do 34 minuty kaj ze kepy szczylŏł Michał Mokrzycki i torman gospodŏrzy próbowŏł wybijać ta bala, ale juz niy miŏł szans.

Pod koniyc piyrwszyj połowy ze wolnygo cyntrowŏł Mateusz Winciersz, a ze kepy tora na 3-1 zdobōł Konrad Kasolik. To bōła połowa ze pełnŏm dominacjōm Ruchu.

We drugij połowie dalyj to Ruch dominowŏł, ale gospodŏrze corŏz barzij faulowali. Ze urazym slôz Tomasz Foszmańczyk (zmiyniŏł go we 58 minucie Kowalski), a chwila potyn mocno kopniōny bōł Patryk Sikora.

Te prôby wybijaniŏ Ruchu ze gry na nic sie zdŏwały bo Niybiescy grali swoje cŏłki czŏs, dziynki temu mōg zadybiutować Kamil Skwiszcz, kiery zmiyniōł Neugebauera we 74 minucie szpilu. Trocha potyn nawet miŏł łokazjŏ na tora, ale jego szczał bōł zablokowany.

We 81 minucie Kamil Lech zrobiōł pod torem gorkô, ale potyn wybijŏł bala spode nóg Przybylskiego, minuta potyn dostŏł żółto kartka za gra na czas. Do końca szpilu Ruch grŏł swoje i niy bōło szans, coby gospodŏrze wydarli dzisiŏj punkty Ruchowi. Na sŏm koniec jesce sŏm na sŏm wylŏz Mariusz Idzik i podcinkŏm ustawiōł wynik szpilu na 4-1.

Mimo zapewniyń ze strony klubu ze Gaci, że kybice wlyzom na szpil, Ci co nŏjwyżyj mogli ino kybicować… policji! Ci zatrzimali ich trocha kole sztadionu Foto Higieny i niy bōło im dane zobŏczyć szpilu.

Nŏsz plus szpilu: Ciynżko kogoś wyróżnić, jak cŏłko drużina grŏ tak dobry szpil. Dzisiŏj dŏwŏmy plusa Mariuszowi Idzikowi za 2 tory i dobrŏ aktywność we cŏłkim szpilu, ale plus należy sie tyż cŏłkij drużinie. Jak nŏstympne szpile bydŏm tak grać, jak tyn ze Foto Higieną, to bydymy spokojnie patrzeć na awans.

Foto-Higiena Gać – Ruch Chorzów 1-4 (1-3)

Skład Foto-Higieny: Jaroszewski – Piórecki, Korytek, Wdowiak, Krzymiński, Bujakiewicz, Krzyśków, Stachowski, Nahrabecki, Orzechowski, Przybylski.

Skład Ruchu: Lech – Kasolik, Sikora, Kawula – Kwaśniewski, Mokrzycki, Foszmańczyk (58 – Kowalski), Neugebauer (74 – Skwiszcz), Winciersz – Janoszka (79 – Paszek), Idzik.

Tory: 34 min. Przybylski : 14 min. Mariusz Idzik, 34 min. Michał Mokrzycki, 43 min. Konrad Kasolik, Mariusz Idzik 93 min.

Kartki do Ruchu: Michał Mokrzycki – 65 min. (żk), Kamil Lech – 84 min. (żk)

We środa, 12 sierpnia zagrŏmy piyrwszy szpil u siã. Do Chorzowa przijedzie Warta Gorzów Wielkopolski. Szpil ło 19:20 przy Cichyj 6. Pamiyntejcie, że we dniu szpilu niy bydzie prowadzonŏ sprzedaż biletów. Kupcie sie go za wczasu.


własne