Wy”moczony” remis z Piastem – relacja

Trudne warunki postawiôł dzisiôj rywal przed drużinom trynera Łukasza Berety, bez co niy ma komplytu punktów, a jedynie do tabyli wleci jedne oczko.

Zacło sie łod… łoberwaniô chmury, kajś ze 30 minut przed szpilym sie zacło i tak bez cołki szpil sie padoł dyszcz. Łod poczôntku szpilu chciało sie ryceć słynne „Kaj momy stadion!” ale i tak do komplytu kybiców nôjważniyjszy bōł doping! Tego niy brakło bez cołki szpil.

Co do szpilu, to zacli my go na spokoju. Zaś kontrola nad balom i ataki z gowom, no ale niy chciało nic wylyźć. We 7 minucie bōło przełomanie! We elwra wlôz Idzik i ewidyntnie bōł kopniōny, a decyzjo syndziego? Elwer! Do bala podloz Mariusz i po nogach tormana, ale ze takom siyłom szczelōł, że bala musiała wlecieć do tora. Eins!

Trocha nos to uspokoiło bo zacli my sie barzij bawić balom, ale zabawy kończom sie stratami. We 22 minucie bōł tego efekt. Dali my trocha za fest przestrzyni gościom, a tam juz Chouwer na gazie wiedziôł jak zacyntrować. Tyn cynter bōł tak dokładny, że Stanclik ino musiôł wychylić gowa i bala sama sie łod niygo łodbiōła. To bōł tak szibki bal, że Nowak niy zdonżōł zareagować., a bala szła juz we jego łokiynko. Po eins!

Modre zacli sie trocha tracić. To Mokrzycki zagroł do nikogo, to Wini cyntrowôł do nikogo, ale jako tako my starali sie barzij, a Piast starôł sie nôs wybijać ze rytmu. We doliczonym czasie piyrwszyj połowy nôjlepszo (potyn miôł jesce jedna) łokazjô miôł Kwaśniewski. Wylôz sôm na sôm i szczelōł, ale niyfart chciôł, że trefiōł we supek!

We drugij połowie, łod razu mielimy szansa na tora, ale bal śliski nôjpiyrw sloz ze nogi Kawuli, potyn Mokrzycki sie nie erbnoł i… wybiōł bala ze tora Korytkowskiego! To bōła kluczowo sytuacjo, bo potyn grali wiyncyj goście. My ino kombinowali, przi elwrze Piasta zamiast szczylać to chopcy podôwali bala i co chwila albo za słabo, albo niecylnie fest szczylali.

We 61 minucie bala straciōł Kulejewski, ale straciōł ja tak srogo, że łod razu we ataku bōło 3 fusbalorzy gości. Cyntruje jedyn ze pomocników Piasta, bala mijô nôszych łobrońców, po koźle jesce wyskakuje i mijo sie z niom Nowak, a do pustego tora pakuje ja Moryson. Zwei do Piasta!

Konsternacjo? Niy! Kybice ruszyli ze dopiyngiym, jakby ich bōło 10 tysiyncy, a nie ino 4400! Niystety, bez efektu we postaci tora do Ruchu. Czuć bōło nyrwy, a kôżdy fusbalorz starôł sie ino nic niy napochać. We 75 minucie odważōł sie Idzik. We elwrze zaś zahacony i syndzia podyktowôł drugi elwer! Idziu zaś zmylōł tormana i bōło 2-2! Leciôł łod razu po bala, ale goście mu to uprzikrzali, we efekcie syndia dôł pora kartek.

Do końca szpilu grôł juz ino Ruch, a nôjwiyncyj działo sie we doliczonym czasie. We 7 minut zrobiyli my wiyncyj łokazji niż bez 90 minut! Nic jednak niy chciało wlyźć do tora, a to dziynki bardzo dobryj grze taktycznyj gości.

Trza pedzieć, że do tyj pory bōł to nôsz nôjgorszy szpil, ale ponoć jedyn kôżdymu sie może trefić, beztosz liczymy, że terozki bydzie już ino lepij.

Nosz plus szpilu: Niy mômy wontpliwości, że należy sie łon kybicom! 97 minut dopingu, dyszcz, nawet łoberwanie chmury! A kybicie rycom, bo grô Ruch! Za to srogi szacun! Dzisiŏj plus wyndruje do zawodnika numer 12!

Ruch Chorzów – Piast Żmigród 2-2 (1-1)

Skład Ruchu: Tomasz Nowak – Kasolik, Kawula (66′ Kowalski), Kulejewski – Kwaśniewski, Sikora (66′ Duchowski), Mokrzycki, Foszmańczyk (46′ Neugebauer), Winciersz – Idzik, Janoszka.

Skład Piasta: Korytkowski – Chouwer, Kendzia, Sosna, Majbroda – Sołtyński, Mozler, Łukaszewski, Moryson – Stanclik, Gołębiowski.

Tory: Idzik 8 min. (elwer), Idzik 75 min. (elwer) – Stanclik 21 min., Moryson 60 min.


własne